सप्तरीमा घरायसी विवादका क्रममा भाइको बञ्चरो प्रहारले दाजुको मृत्यु

सप्तरी — सप्तरीको राजविराज नगरपालिका–१ पडरियामा शुक्रबार बिहान घरायसी विवादका क्रममा भाइको बञ्चरो प्रहारबाट दाजुको ज्यान गएको छ।

जिल्ला प्रहरी कार्यालय सप्तरीका अनुसार ३० वर्षीय नरेन्द्र झाले ४० वर्षीय दाजु लोकेन्द्र झामाथि बञ्चरो प्रहार गरेका थिए। बञ्चरो प्रहारबाट गम्भीर घाइते भएका लोकेन्द्रलाई सुरुमा छिन्नमस्ता अस्पताल, राजविराजमा भर्ना गरिएको थियो। तर त्यहाँ अवस्था जटिल बन्दै गएपछि उनलाई थप उपचारका लागि नोबेल अस्पताल, विराटनगर लगिएको थियो।

तर उपचारकै क्रममा शुक्रबार दिउँसो सवा ३ बजे लोकेन्द्रको मृत्यु भएको जिल्ला प्रहरी कार्यालयका प्रवक्ता डीएसपी जितेन्द्रकुमार बस्नेतले जानकारी दिए।

दाजु–भाइबीचको विवादको कारण हालसम्म स्पष्ट हुन नसकेको प्रहरीले जनाएको छ। घटनापछि फरार रहेका आरोपी नरेन्द्र झाको खोजी भइरहेको प्रहरीले बताएको छ।