चौकुने गाउँपालिका र पञ्चपुरी नगरपालिकाको संगमस्थलमा रहेको प्रसिद्ध धार्मिक स्थल कागेश्वरी माईको मेला लाग्दै

चौकुने। आज पञ्चपुरी नगरपालिकाको वडा नम्बर ७ मा रहेको पञ्चपुरी कागेश्वरी माईको मन्दिरमा धार्मिक मेला लाग्ने भएको छ ।  पञ्चपुरी नगरपालिकाको नामाकरण सोही मन्दिरको नामबाट गरिएको र उक्त मन्दिरमा साउन शुक्ल चतुर्दशीका दिन मेला लाग्ने भएको छ ।

प्रत्येक वर्ष कागेश्वरी माईको मन्दिर दर्शन गर्नका लागि कैलाली अछाम दैलेख सुर्खेत लगायतका विभिन्न स्थानबाट हजारौं भक्तजनहरुको भिड लाग्ने गरेको छ । प्रत्येक वर्ष जनैपूर्णिमाको अघिल्लो दिन लाग्ने कागेस्वरी माईको मेलालाई यो वर्ष भव्य र व्यवस्थित बनाइने भएको छ। साथै पञ्चपुरी नगरपालिकाको नामाकरण सोही मन्दिरको नामबाट गरिएको र उक्त मन्दिरमा साउन शुक्ल चतुर्दशीका दिन मेला लाग्ने भएको हुँदा नगरपालिकाभित्र रहेका नगर मातहतका सबै कार्यालय तथा शैक्षिक संस्थाहरूमा एक दिन सार्वजनिक बिदा दिइएको पञ्चपुरी नगरपालिकाले जनाएको छ ।

प्राकृतिक छटाले भरिपूर्ण धार्मिक तथा पर्यटकीय हिसाबले प्रचूर सम्भावना बोकेको कागेश्वरी माईको मन्दिर चौकुने गाउँपालिका र पञ्चपुरी नगरपालिकाको संगमस्थलमा हो भने हिन्दुहरूको आस्थाको धरोहर माईको मन्दिर निर्माणले धेरैलाई आकर्षित गरेको छ। कागेश्वरी माईको जति चर्चा गरे पनि कम हुन्छ ।

धार्मिक आस्था र प्राकृतिक छटाले भरिपूर्ण माईको मन्दिर पछिल्लो समय आकर्षक गन्तव्य बन्दै गएको छ। कागेश्वरी माईको दर्शनले मनले चिताएको पूरा हुने जनविश्वास छ। पुत्र नभएकाहरूलाई पुत्र प्राप्ति, धन नहुनेलाई धन, दुःखीलाई सुख प्राप्त हुने अगाध विश्वास रहेको छ युवादेखि ज्येष्ठ नागरिक पुस्ताका भक्तजनहरू मेलामा आउने, कागेश्वरी माईको थानमा आशीर्वाद माग्ने, मनोकांक्षा पूरा भएको भन्दै धन्यवाद व्यक्त गर्न पनि भक्तहरू आउने गरेका छन्। कागेश्वरी माईको दर्शन गरेपछि चिताएको पूरा हुन्छ भन्ने जनविश्वास रहँदै आएको छ।