नेपालमै पहिलोपटक उड्ने कार

अब नेपालमा पनि उड्ने कारको युग सुरु हुँदैछ। नेपालमा पहिलोपटक विद्युतीय उडान सवारीसाधन (उड्ने कार) भित्रिएको छ।

नाडा अटोमोबाइल्स एसोसिएसन अफ नेपालले आगामी भदौ ३ देखि ८ गतेसम्म काठमाडौंको भृकुटीमण्डपमा आयोजना गर्न लागेको नाडा अटो शो २०२५ मा ‘दीपल ईभीटीओएल यूएभी’ नामक उड्ने कार प्रदर्शन गरिने भएको हो।

दीपल ईभी ब्रान्डको आधिकारिक वितरक एमएडब्लू वृद्धि अटो कर्प प्रालिले उड्ने कार नेपाल ल्याएको हो। कम्पनीका प्रतिनिधि दिनेश सिकायुका अनुसार यो कार भविष्यको सहरी हवाई यातायातको झलक हो। “यसपटकको अटो शो अहिलेसम्मकै सबैभन्दा रोमाञ्चक हुनेछ,” उनले बताए।

दक्षिण एसियामै अटो शोमा उड्ने कार प्रदर्शन गर्ने नेपाल पहिलो देश बन्ने भएको छ। पूर्णरूपमा विद्युतीय यो कारले ठाडो उडान र अवतरण गर्न सक्छ। चीनमा निर्माण गरिएको यो कार ईभीटीओएल प्रविधिमा आधारित छ, जुन विश्वभर लोकप्रिय हुँदै गएको छ।

हाल नेपालमा उड्ने कार सञ्चालनको कानुनी र नीतिगत व्यवस्था भने छैन। नाडा अध्यक्ष करण चौधरीले अहिले परीक्षणका लागि मात्रै प्रदर्शनीमा राखिएको बताए। “नेपालमा यस्ता प्रविधिका लागि नीतिगत तयारी आवश्यक छ,” उनले भने।

शो अवलोकन गर्न चाहनेहरूले खल्ती एप मार्फत टिकटको अग्रिम खरिद गर्न सक्नेछन्।