कर्णाली स्वास्थ्य विज्ञान प्रतिष्ठानमा भिडियो एक्सरे सेवा एक महिनादेखि बन्द

जुम्ला — कर्णाली स्वास्थ्य विज्ञान प्रतिष्ठानमा भिडियो एक्सरे सेवा बन्द हुँदा सेवाग्राही सास्तीमा परेका छन्।

अस्पतालको भिडियो एक्सरे र अल्ट्रासाउण्ड सेवा करिब एक महिनादेखि अवरुद्ध रहेको छ। तिला गाउँपालिकाका टोपबहादुर रावतका अनुसार, उपचारका लागि आउने बिरामीहरू आवश्यक भिडियो एक्सरे सेवाबाट वञ्चित भएका छन्।

प्रतिष्ठानका निमित्त उपकुलपति डा. डबलबहादुर धामीले जनशक्ति अभावकै कारण सेवा बन्द रहेको जानकारी दिएका छन्। उनका अनुसार, भिडियो एक्सरे मेसिन त उपलब्ध छ, तर चलाउने रेडियोलोजिस्ट नहुँदा सेवा प्रवाह हुन सकेको छैन।

“हामीले रेडियोलोजिस्टका लागि माग गरेका थियौं, तर अहिलेसम्म कोही पनि सम्पर्कमा आएका छैनन्,” डा. धामीले भने।

उनका अनुसार, एक साताअघि बन्द भएको सिटिस्क्यान सेवा भने पुनः सञ्चालनमा ल्याइएको छ।