कर्णाली प्रदेशको खेलकुदमा नयाँ नेतृत्व: प्रमोद हमालको काँधमा जिम्मेवारी, को-को छन् टिममा?

सुर्खेत।सुर्खेतमा सम्पन्न प्रदेश अधिवेशनबाट नेकपा एमाले निकटको नेपाल खेलकुद महासंघ, कर्णाली प्रदेशले नयाँ नेतृत्व पाएको छ। महासंघको स्थायी कमिटी सदस्यसमेत रहेका प्रमोद हमाल सर्वसम्मत रूपमा अध्यक्षमा चयन भएका छन्। यो चयनसँगै अब कर्णाली प्रदेशको खेलकुद विकासको नेतृत्व हमालको काँधमा आएको छ। वीरेन्द्रनगरमा शुक्रबारदेखि सुरु भएको अधिवेशनले हमालको नेतृत्वमा नयाँ कार्यसमिति बनाएको हो, जसले प्रदेशमा खेलकुद गतिविधिलाई नयाँ उचाइमा पुर्याउने अपेक्षा गरिएको छ।

हमालको अध्यक्षतामा गठित नयाँ समितिमा उपाध्यक्षहरू डम्बर बहादुर शाही र पूर्णबहादुर शाही छन् भने सचिवको जिम्मेवारी शशिराम विश्वकर्माले पाएका छन्। यसैगरी, उपसचिवमा भक्तबहादुर शाह र रेखा बुढा तथा कोषाध्यक्षमा जगत प्रसाद रिजाल चयन भएका छन्। समितिमा विभिन्न जिल्ला र खुला तर्फबाट सदस्यहरू पनि चयन गरिएको छ। नवनिर्वाचित अध्यक्ष हमालका अनुसार, कार्यसमितिलाई पूर्णता दिन बाँकी रहेका ६ जना सदस्य पहिलो बैठकबाटै मनोनित गरिनेछ र त्यसपछि महासंघ पूर्ण गतिमा अघि बढ्नेछ।