- साउन १६, २०८२
- No Comment
- 29
कोदो दिवस मनाउँदै प्रधानमन्त्रीको सन्देश : परम्परा र पोषणको महत्वलाई जोड

काठमाडौं, साउन १६ — परम्परागत खाद्यान्न बाली ‘कोदो’को महत्वलाई उजागर गर्दै सरकारले साउन १६ गतेलाई राष्ट्रिय कोदो दिवसको रूपमा मनाउने निर्णय गरेको छ। कोदो दिवसको अवसरमा प्रधानमन्त्री केपी शर्मा ओलीले सामाजिक सञ्जालमार्फत शुभकामना दिँदै कोदोको उपयोगिता र पोषणीय विशेषता औंल्याएका छन् ।
प्रधानमन्त्री ओलीले दिएको सन्देशमा उल्लेख गरिएअनुसार, कोदोमा ग्लाइसेमिक इन्डेक्स कम हुने भएकाले यसले रगतमा चिनीको मात्रा नियन्त्रण गर्न सहयोग पुर्याउँछ। साथै, कोदोमा प्रशस्त मात्रामा पाइने फाइबरले हृदय स्वास्थ्य मजबुत बनाउन मद्दत गर्छ। सिँचाइको आवश्यकता नपर्ने र कठिन भू-भागमा पनि उत्पादन गर्न सकिने भएकाले कोदो जस्ता अन्नबालीहरू जलवायु परिवर्तनको सन्दर्भमा समेत महत्वपूर्ण ठहरिन्छन्।
सरकारले कोदोको उत्पादन र उपभोगमा वृद्धि ल्याउने लक्ष्यसहित कोदो दिवसलाई प्रवर्द्धन अभियानका रूपमा अघि बढाउने जनाएको छ। प्रधानमन्त्रीले “कोदो उत्पादन बढाऔं, कोदोका परिकारहरू उपभोग गरौं” भन्ने सन्देश दिँदै नेपालीको स्वास्थ्य, पहिचान र आत्मनिर्भरता प्रवर्द्धन गर्न कोदो जस्ता अन्नबालीको भूमिका महत्वपूर्ण हुने बताए।