सुर्खेतमा लागुऔषध मुद्दामा १५ वर्ष कैद र ५ लाख जरिवाना सजाय पाएका फरार सापकोटा पक्राउ

सुर्खेत। लागुऔषध (ब्राउन सुगर) कारोबार मुद्दामा उच्च अदालतबाट १५ वर्ष कैद र पाँच लाख रुपैयाँ जरिवाना सजाय तोकिएका एक फरार प्रतिवादीलाई सुर्खेत प्रहरीले पक्राउ गरेको छ । एक वर्षभन्दा बढी समयदेखि फरार रहेका वीरेन्द्रनगर नगरपालिका–६ निवासी ४२ वर्षीय लक्ष्मण सापकोटालाई प्रहरीले शनिबार वीरेन्द्रनगरबाटै पक्राउ गरेको हो ।

जिल्ला प्रहरी कार्यालय सुर्खेतका अनुसार उच्च अदालत तुल्सीपुर, दाङ इजलासले २०८० असार ५ गते सापकोटालाई दोषी ठहर गर्दै उक्त सजाय सुनाएको थियो । नेपाल सरकार वादी भएको उक्त मुद्दामा फैसला आएदेखि नै उनी फरार रहँदै आएका थिए ।

कर्णाली प्रदेश प्रहरी कार्यालय र जिल्ला प्रहरी कार्यालय सुर्खेतबाट खटिएको संयुक्त विशेष टोलीले फरार सापकोटाको खोजीलाई तीव्र पारेको थियो । सोही क्रममा  आज बिहान  ११ बजे वीरेन्द्रनगर नगरपालिका–८ स्थित नगरपालिका कार्यालय नजिकैबाट उनलाई नियन्त्रणमा लिन प्रहरी  लिएकाे हो ।

पक्राउ परेका सापकोटालाई फैसला कार्यान्वयनका लागि  सुर्खेत जिल्ला अदालतमा पेस गरिएको प्रहरीले जनाएको छ ।