पानी पार्न चौकुने ४ बिजौरामा महादेव इन्द्रको पूजापाठ

चौकुने। पानी नपरेपछि दैनिक जसो इन्द्र पूजा, भ्यागुता पूजा, माई पूजा लगायतका पूजा गर्दै पानी माग्न थालिएको छ । लामो समयसम्म पानी नपरेपछि पानी पार्न भन्दै चौकुने गाउँपालिका – ४ बिजौराको झाला नजिकै कर्णालीको किनारामा सामूहिक पूजापाठ गरिएको छ ।

श्रावनको पहिलो साता बितिसक्दा पनि पानी नपरेर खेतबारीमा लगाएका अन्नबाली , तरकारी बाली, तथा फलफूल सुक्न थालेपछि स्थानीयले पानी पार्न भन्दै महादेवसँग प्रथाना गरेका छन् । पं. थानेश्वर प्रसाद उपाध्यायको नेतृत्वमा चौकुने ४ बिजौराका बासिन्दाले स्वस्ति शान्ति, महारुद्री सहित इन्द्र पूजा गरिएको हो ।

पानी नपरेका कारण मकैका बोट र खेतमा रोपेको धान र धानका बिउँ सुक्न थालेका छन् । भगवान् महादेव र इन्द्रको पूजा गरेमा पानी पर्ने जनविश्वासका साथ पूजा गरिएको पुजा व्यवस्थापन समिति अध्यक्ष भुमि प्रसाद जैसीले बताउनुभयो । इन्द्र भगवानलाई खुसी पार्न भजनकृर्तन, होम, ब्राह्मणद्वारा पाठ पुरायण नै गरेर इन्द्र देवताको पूजा गरेको पुजा व्यवस्थापन समितिका सचिव दिपक बि सी ले बताउनुभयो ।