बागमती, गण्डकी र लुम्बिनीका पहाडी क्षेत्रहरूमा भारी वर्षाको सम्भावना

काठमाडौं।  देशभर हाल सक्रिय रहेको मनसुनी प्रणालीको प्रभावका कारण विभिन्न स्थानमा वर्षा भइरहेकाे छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानको आसपासमा रहेकाले काठमाडौँ उपत्यकासहित देशका विभिन्न भागहरूमा वर्षा भएको जनाइएको छ ।

महाशाखाका अनुसार आज दिउँसो देशभर आंशिकदेखि सामान्य बदली रहनेछ । गण्डकी, बागमती र सुदूरपश्चिम प्रदेशका साथै देशका पहाडी भू–भागका केही स्थानहरूमा र तराई भू–भागका थोरै स्थानहरूमा मेघगर्जन र चट्याङसहित मध्यम वर्षाको सम्भावना रहेको छ ।

साथै, बागमती, गण्डकी र लुम्बिनी प्रदेशका पहाडी भू–भागका एक–दुई स्थानमा भारी वर्षा हुन सक्ने सम्भावना रहेको मौसम विभागले जनाएको छ ।

आज राति पनि देशभर सामान्य बदलीको स्थिति रहने र गण्डकी लगायतका पहाडी क्षेत्रहरूमा केही स्थानमा मेघगर्जन र चट्याङसहित मध्यम वर्षा हुने सम्भावना रहेको विभागले जनाएको छ ।

मौसम विभागले भारी वर्षाको सम्भावनालाई ध्यानमा राख्दै सतर्क रहन, नदी किनार र भूस्खलन सम्भावित क्षेत्रहरूमा आवश्यक सतर्कता अपनाउन सर्वसाधारणलाई अनुरोध गरेको छ ।