२८ दिनदेखि बेपत्ता सुर्खेतका १६ वर्षीय किशोर क्षितिज श्रीस मृत फेला

 सुर्खेत, ५ चैत । सुर्खेतको गुर्भाकोट नगरपालिका–१४ भर्लेनी निवासी १६ वर्षीय किशोर क्षितिज श्रीस २८ दिनपछि मृत अवस्थामा फेला परेका छन्।

गत फागुन ७ गते भोटेचुली जाने क्रममा बेपत्ता भएका क्षितिजको शव बुधबार टोट्केको जंगलमा फेला परेको प्रहरीले जनाएको छ। स्थानीय पिसल्याण्ड विद्यालयमा कक्षा १० मा अध्ययनरत उनी सोही दिनदेखि सम्पर्कविहीन भएका थिए।

परिवार र प्रहरीले लामो समयसम्म खोजी गर्दा पनि कुनै जानकारी प्राप्त हुन नसकेको अवस्थामा भोटेचुली नजिकै पर्ने जंगल क्षेत्रमा मुख्य सडकभन्दा केही माथि उनको शव भेटिएको प्रहरीले जनाएकाे छ ।

घटनापछि स्थानीयवासीले निष्पक्ष छानबिनको माग गरेका छन्। घटनास्थलमा पुगेको प्रहरीले प्रारम्भिक मुचुल्का तयार गरेको छ भने मृत्युको कारण अझै खुल्न सकेको छैन।

जिल्ला प्रहरी कार्यालयका अनुसार शवलाई पोस्टमार्टमका लागि पठाइने तयारी भइरहेको छ र घटनाबारे थप अनुसन्धान  भइरहेको छ।