बैंकिङ कसुर मुद्दाका फरार अभियुक्त कोहलपुरबाट पक्राउ

जाजरकोट । बैंकिङ कसुर (चेक बाउन्स) मुद्दामा फरार रहेका एक  अभियुक्तलाई जाजरकोट प्रहरीले बाँकेको कोहलपुरबाट पक्राउ गरेको छ । पक्राउ पर्नेमा जाजरकोटको छेडागाड नगरपालिका वडा नं. ८ का २८ वर्षीय बिरखे बहादुर गिरी रहेका छन् ।

जगत शाहले दिएको जाहेरीका आधारमा नेपाल सरकार वादी भएको बैंकिङ कसुर मुद्दामा गिरी फरार थिए । वारदातपछि उनी फरार रहँदै आएको र कोहलपुर क्षेत्रमा लुकेर बसेको भन्ने विशेष सूचनाका आधारमा जाजरकोट प्रहरीले अनुसन्धान अघि बढाएको थियो ।

जिल्ला प्रहरी कार्यालय, जाजरकोटका सूचना अधिकारी एवं प्रहरी निरीक्षक हरि राम डाँगीका अनुसार, इलाका प्रहरी कार्यालय, कोहलपुरसँगको समन्वयमा खटिएको प्रहरी टोलीले गिरीलाई  शुक्रबार बिहान ८ बजे कोहलपुर नगरपालिका–१४, पिपिरी स्थित सार्वजनिक सडकमा हिँडिरहेको अवस्थामा पक्राउ गरेको हो ।

पक्राउ परेका गिरीलाई जाजरकोट ल्याई जिल्ला अदालतमा पेश गरिएकोमा अदालतले अनुसन्धानका लागि ७ दिनको म्याद थप गरी हिरासतमा राख्न अनुमति दिएको छ । प्रहरीले घटनाबारे थप अनुसन्धान गरिरहेको जनाएको छ ।