बिहान भिजाएको बदाम खाँदा यस्ता छन फाइदाहरू

काठमाडौं । पोषण तत्वले भरिपूर्ण बदामलाई सबैभन्दा उपयोगी सुपरफुड मानिन्छ । नियमित रूपमा यसको सेवनले शारीरिक, मानसिक तथा छाला–कपालको स्वास्थ्यमा उल्लेख्य सुधार आउने विभिन्न अध्ययनले देखाएका छन् । पोषक तत्वहरूको उच्च मात्रा भएका कारण बिहान भिजाएर खाइने बदामले अझ प्रभावकारी फाइदा दिने स्वास्थ्य विज्ञहरू बताउँछन्।

बदाममा प्रोटिन, क्याल्सियम, फाइबर, म्याग्नेसियम, पोटासियम, भिटामिन ‘ई’ तथा स्वस्थ बोसो प्रशस्त पाइन्छ । तर बदाम एलर्जी हुनेले यसको सेवन नगर्नुपर्ने सुझाव विशेषज्ञहरू दिन्छन्।

यहाँ बिहान भिजाएको बदाम सेवन गर्दा पाइने पाँच प्रमुख फाइदाहरू उल्लेख गरिएको छः

१. पाचन प्रणालीमा सुधार

बिहान भिजाएको बदाम खाँदा पाचन क्रिया सहज हुने स्वास्थ्यकर्मीहरू बताउँछन्। यसले पोषक तत्व अवशोषणलाई पनि प्रभावकारी बनाउने भएकाले पेटसम्बन्धी धेरै समस्या घटाउन मद्दत गर्छ।

२. मांसपेशी मजबुत बनाउँछ

बदाम प्रोटिनको उत्कृष्ट स्रोत मानिन्छ। १०० ग्राम बदाममा करिब २५ ग्राम प्रोटिन पाइने भएकाले भिजाएको बदाम नियमित सेवन गर्नु मांसपेशी वृद्धि र विकासका लागि निकै लाभदायक हुन्छ।

३. मुटु स्वास्थ्यका लागि लाभदायी

स्वस्थ फ्याटले भरिपूर्ण बदामले कोलेस्ट्रोल नियन्त्रणमा भूमिका खेल्ने कुरा विभिन्न अध्ययनले पुष्टि गरेका छन्। यसले रक्तसञ्चार र मेटाबोलिजम सुधार्न मद्दत गर्ने भएकाले हृदयलाई पर्याप्त पोषण पुग्छ र मुटु स्वस्थ रहन सहयोग हुन्छ।

४. मस्तिष्क क्षमतामा वृद्धि

बदामलाई ‘ब्रेन–फुड’ पनि भनिन्छ। भिजाएको बदाम सेवनले स्मरण शक्ति राम्रो बनाउने, ध्यान केन्द्रित गर्ने क्षमतामा सुधार ल्याउने र मानसिक स्वास्थ्यमा सकारात्मक प्रभाव पार्ने बताइन्छ।

५. छाला र कपालका लागि उपयोगी

प्रोटिन, भिटामिन ई तथा अन्य आवश्यक पोषक तत्वले भरिपूर्ण बदामले छाला तथा कपालको स्वास्थ्यमा उल्लेख्य सुधार ल्याउँछ। यसले छालालाई ग्लोइङ बनाउने र कपाललाई बलियो तथा चम्किलो राख्न मद्दत गर्छ।

विशेषज्ञका अनुसार, बिहान ४–६ दाना भिजाएको बदाम नियमित सेवन गर्नु अधिकांश मानिसका लागि सुरक्षित र लाभदायक मानिन्छ। तर कुनै प्रकारको एलर्जी वा स्वास्थ्य समस्या भए चिकित्सकको सल्लाह लिनु उपयुक्त हुन्छ।