२४३ ट्याब्लेट नाईट्राजेपामसहित वीरेन्द्रनगरबाट दुई युवक पक्राउ

सुर्खेत । जिल्ला प्रहरी कार्यालय सुर्खेतले लागुऔषध नाईट्राजेपाम सहित दुई जनालाई पक्राउ गरेको छ। सोमबार साँझ वीरेन्द्रनगर नगरपालिका-३ बाट उनीहरुलाई २४३ ट्याब्लेट नाईट्राजेपाम सहित नियन्त्रणमा लिइएको हो।

प्रहरीका अनुसार, वीरेन्द्रनगर-३ मा लागुऔषधको कारोबार भइरहेको भन्ने विशेष सुचनाको आधारमा खटिएको प्रहरी टोलीले उनीहरुलाई शंकास्पद अवस्थामा फेला पारेको थियो। उनीहरुको शरीर खानतलासी गर्दा उक्त परिमाणको लागुऔषध बरामद भएको जिल्ला प्रहरी कार्यालय सुर्खेतले जनाएको छ।

पक्राउ पर्नेमा सुर्खेत वीरेन्द्रनगर नगरपालिका-३ बस्ने २९ वर्षीय कमल कार्की र दैलेखको दुल्लु नगरपालिका-६ घर भई हाल वीरेन्द्रनगर-३ मै बस्दै आएका २१ वर्षीय ध्वनिल मल्ल रहेका छन्।

पक्राउ परेका दुवै जनालाई जिल्ला प्रहरी कार्यालय सुर्खेतमा राखी लागुऔषध नियन्त्रण ऐन अन्तर्गत थप अनुसन्धान अगाडि बढाइएको प्रहरीले जानकारी दिएको छ।