सुर्खेतमा करेन्ट लागेर दम्पतीको मृत्यु

वीरेन्द्रनगर ।  सुर्खेतको वीरेन्द्रनगरमा करेन्ट लागेर एक दम्पतीको  मृत्यु भएको छ । वीरेन्द्रनगर नगरपालिका-१२ नेवारेस्थित आफ्नै घरमा  घाँस काट्ने क्रममा करेन्ट लाग्दा ५५ वर्षीय धनिराम आचार्य र उहाँकी ५० वर्षीया श्रीमती धन कुमारी उपाध्यायको ज्यान गएको हो ।

जिल्ला प्रहरी कार्यालय सुर्खेतका अनुसार, आचार्य दम्पतीले बिहान  १०:४५ बजे आफ्नै घरमा विद्युतीय मेसिन प्रयोग गरी घाँस टुक्र्याइरहेका थिए । सोही क्रममा मेसिनको तारबाट करेन्ट प्रवाह हुँदा दुवै जना गम्भीर घाइते भएका थिए ।

घटनालगत्तै घाइते दम्पतीलाई उपचारका लागि प्रदेश अस्पताल कालागाउँ, सुर्खेतमा लगिएको थियो । तर, अस्पताल पुर्‍याएको केही बेरमै करिब ११:१५ बजे उपचारकै क्रममा उनीहरु दुवैलाई चिकित्सकले मृत घोषणा गरेका थिए ।

घटनाको खबर प्राप्त हुनासाथ जिल्ला प्रहरी कार्यालय सुर्खेतबाट प्रहरी नायब निरीक्षक गगन सिंहको नेतृत्वमा ६ जनाको प्रहरी टोली घटनास्थलमा पुगेर अनुसन्धान सुरु गरेको छ । प्रहरीले घटनाको बारेमा थप अनुसन्धान भइरहेको जनाएको छ ।