खडेरीको मारमा सल्यानका किसान: खेतमै सुक्न थाल्यो धानको ब्याड, आकाश हेर्दै किसान

सल्यान। सल्यानको पश्चिमी क्षेत्रमा यस वर्ष मनसुनले धोका दिँदा किसानहरू गम्भीर समस्यामा परेका छन्। लामो समयदेखि पानी नपरेका कारण धान रोप्नका लागि तयार पारिएको ब्याड खेतमै सुक्न थालेको छ, जसले गर्दा किसानको मेहनत र लगानी दुवै खेर जाने अवस्था सिर्जना भएको छ। सामान्यतया, असारको अन्त्य र साउनको पहिलो हप्तासम्ममा रोपाइँ सकिने भए पनि यसपटक खडेरीले गर्दा अधिकांश खेत बाँझै छन्। पानीको अभावमा रोपाइँ गर्न नपाउँदा किसानहरू चिन्तित बनेका छन् र आकाशतिर हेरेर पानीको प्रतीक्षा गरिरहेका छन्।

विगतका वर्षहरूमा यो समयमा हरियाली देखिने खेतहरू अहिले सुख्खा र उजाड छन्। सिँचाइ कुलोमा पानीको सतह घटेपछि रोपाइँ भइसकेका थोरै खेतमा पनि पानी पुग्न सकेको छैन, जसले गर्दा रोपेको धान पनि सुक्न थालेको छ। पानीको स्रोत सीमित हुँदा किसानहरूबीच पानी लगाउने विषयमा विवाद र मनमुटाव समेत हुन थालेको छ। बनगाड ज्यूला, भेरी किनार र सल्लीबजार जस्ता प्रमुख धान उत्पादन क्षेत्रमा पनि रोपाइँ हुन सकेको छैन भने वालुवासंग्रही र सुनौली खोला आसपासका सिञ्चित खेतहरू पनि पानी नपरेका कारण बाँझै छन्। यो खडेरीले यस क्षेत्रको मुख्य खाद्य बाली धानको उत्पादनमा ठूलो असर पार्ने निश्चित देखिएको छ।