गर्मीमा लस्सी पिउनुका यस्ता छन् फाइदा

गर्मीको मौसममा शरीरलाई चिसो र स्वस्थ राख्न धेरै उपाय अपनाइन्छ, तर प्राकृतिक रूपमा स्वास्थ्य लाभ दिने पेयपदार्थको कुरा गर्दा लस्सी उत्कृष्ट विकल्प बन्न सक्छ। आयुर्वेद र चिकित्सा विज्ञानले लस्सीलाई स्वास्थ्यका लागि निकै लाभदायक मानेको छ।

दहीलाई फिटेर तयार पारिने लस्सी स्वादिलो मात्रै नभई पोषक तत्वले भरिपूर्ण हुन्छ। विशेषगरी गर्मीको मौसममा लस्सीको नियमित सेवनले डिहाइड्रेसनबाट बच्न, पाचन क्रिया सुधार गर्न, र कलेजो, छाला, हड्डी तथा प्रतिरोधात्मक क्षमतामा सकारात्मक असर पार्ने विज्ञहरू बताउँछन्।

कलेजोका लागि लाभदायक

लस्सी प्रोबायोटिक गुणले भरिपूर्ण पेय हो जसले कलेजोमा जम्मा हुने बोसो हटाउन, सूजन कम गर्न, र सिरोसिसका लक्षण सुधार गर्न मद्दत गर्छ। तौल घटाउन चाहनेका लागि पनि लस्सी लाभदायक मानिन्छ।

छाला र कपालमा सकारात्मक असर

लस्सीमा रहेको ल्याक्टिक एसिडले छालाको सुख्खापन हटाउन, दाग कम गर्न, र छालालाई मोइस्चराइज गर्न मद्दत गर्दछ। भिटामिन डी र ल्याक्टिक एसिडको संयोजनले छालाको उमेरजन्य असरलाई पनि कम गर्न सहयोग पुर्‍याउँछ। साथै, लस्सीले कपाललाई पनि स्वस्थ र चम्किलो बनाउँछ।

हड्डी बलियो बनाउने

लस्सीमा प्रशस्त मात्रामा पाइने क्याल्सियमले हड्डी र दाँतलाई मजबुत बनाउन सहयोग पुर्‍याउँछ। विशेषगरी उमेर बढ्दै जाँदा हड्डीसम्बन्धी समस्या रोक्न क्याल्सियमयुक्त खानेकुराको नियमित सेवन आवश्यक मानिन्छ।

प्रतिरोधात्मक क्षमता बढाउँछ

लस्सीमा हुने ल्याक्टिक एसिड र भिटामिन डीले शरीरको प्रतिरक्षा प्रणालीलाई मजबुत बनाउँछ। यसले विभिन्न रोगसँग लड्ने क्षमता बढाउँछ र सम्पूर्ण स्वास्थ्यलाई पनि सुदृढ बनाउँछ।

विशेषज्ञका अनुसार लस्सीको सेवन बालबालिकादेखि वृद्धवृद्धासम्म सबैका लागि उपयोगी र स्वास्थ्यवर्धक हुने भएकाले यो गर्मीमा अपनाउनु पर्ने प्रमुख प्राकृतिक पेय मानिन्छ।