आजको मौसम : यी प्रदेशमा वर्षाकाे सम्भावना

 हाल देशभर मनसुनी वायुले प्रभाव जमाएको छ। मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानको आसपासमा रहेकाले देशभर आंशिकदेखि सामान्य बदलीको अवस्था छ।

बागमती, गण्डकी, लुम्बिनी र कर्णाली प्रदेशका थोरै स्थानहरू तथा कोशी र सुदूरपश्चिम प्रदेशका एक–दुई स्थानमा हल्कादेखि मध्यम वर्षा भइरहेको छ।

आज दिउँसो पनि देशभर सामान्यतया बदली रहनेछ। कोशी, बागमती, गण्डकी, लुम्बिनी लगायतका पहाडी भू-भागका केही स्थानहरूमा र बाँकी प्रदेशका थोरै स्थानहरूमा मेघगर्जन र चट्याङसहित हल्का देखि मध्यम वर्षा हुन सक्ने महाशाखाले जनाएको छ।

कोशी, बागमती, गण्डकी र लुम्बिनी प्रदेशका एक–दुई स्थानमा भने भारी वर्षाको सम्भावना रहेको छ। उच्च पहाडी तथा हिमाली भू-भागका थोरै स्थानहरूमा हल्कादेखि मध्यम वर्षा तथा हिमपात हुन सक्ने पूर्वानुमान गरिएको छ।

महाशाखाले आगामी २४ घण्टाका लागि विशेष सतर्कता अपनाउन आग्रह गरेको छ। लगातारको वर्षाका कारण भू-क्षय, बाढी, पहिरो र गेग्रान बहावको जोखिम रहने देखिएको छ। विशेषगरी शहरी तथा तराई क्षेत्रहरूमा डुबानको खतरा रहेको महाशाखाले जनाएको छ।

त्यस्तै, ठूला साना नदी, खोलाहरूमा पानीको सतह बढ्न सक्ने हुँदा तटीय क्षेत्रका बासिन्दालाई सतर्क रहन भनिएको छ। साथै दैनिक जनजीवन, कृषि, स्वास्थ्य, पर्यटन, निर्माण कार्य, सडक तथा हवाई यातायात समेत प्रभावित हुन सक्ने सम्भावनालाई ध्यानमा राखी सबै सरोकारवालाहरूलाई पूर्व तयारी तथा आवश्यक सावधानी अपनाउन महाशाखाले आग्रह गरेको छ ।