सुर्खेतमा ९ ग्राम ब्राउनसुगरसहित जाजरकोटका युवक पक्राउ

सुर्खेत, असार २९। जिल्ला प्रहरी कार्यालय सुर्खेतले ९ ग्राम ३५० मिलिग्राम अवैध लागुऔषध (ब्राउनसुगर) सहित एक युवकलाई पक्राउ गरेको छ। जाजरकोटका २४ वर्षीय युवराज शाहीलाई वीरेन्द्रनगर नगरपालिका-११ शुब्वाकुनाबाट बुधबार राति पक्राउ गरिएको हो।

जिल्ला प्रहरी कार्यालय सुर्खेतका अनुसार, शुब्वाकुनामा लागूऔषधको कारोबार भइरहेको भन्ने विशेष सूचनाको आधारमा कर्णाली प्रदेश प्रहरी कार्यालय र जिल्ला प्रहरी कार्यालयको संयुक्त टोली खटिएको थियो। प्रहरीले नेपालगञ्जबाट सुर्खेततर्फ आउँदै गरेको क.प्र.०२००१ ज ०६४३ नम्बरको ई.भी. गाडीलाई रोकेर जाँच गर्ने क्रममा शाही पक्राउ परेका हुन्।

सोही गाडीमा सवार शाहीको गतिविधि शंकास्पद देखिएपछि प्रहरीले उनको शरीर खानतलासी गरेको थियो। खानतलासीका क्रममा उनको साथबाट ९.३५० ग्राम (नौ ग्राम तीन सय पचास मिलिग्राम) ब्राउनसुगर जस्तो देखिने गिलो पदार्थ बरामद गरिएको प्रहरीले जनाएको छ।

पक्राउ पर्नेमा जाजरकोटको जुनिचाँदे गाउँपालिका वडा नं. २ का स्थायी बासिन्दा भई हाल सुर्खेतको वीरेन्द्रनगर नगरपालिका-१२ चनौटेमा बस्दै आएका २४ वर्षीय युवराज शाही रहेको प्रहरीले  जनाएकाे छ ।

  उनीविरुद्ध लागूऔषध सम्बन्धी मुद्दा दर्ता गरी जिल्ला अदालत सुर्खेतबाट म्याद थप गरेर थप अनुसन्धान अगाडि बढाइएको जिल्ला प्रहरी कार्यालय सुर्खेतले जानकारी दिएको छ।