लागूऔषधसहित चार युवा पक्राउ

धनगढी । कैलाली प्रहरीले जिल्लाको दक्षिणी सीमावर्ती क्षेत्रबाट अवैध लागूऔषधसहित चार जनालाई पक्राउ गरेको छ। भजनी नगरपालिका–५, लालबोझीमा भारतबाट नेपालतर्फ आउँदै गरेका दुईवटा मोटरसाइकलमा सवार उनीहरूलाई शंकाको आधारमा जाँच गर्दा लागूऔषधसहित पक्राउ गरिएको हो।

जिल्ला प्रहरी कार्यालय, कैलालीका अनुसार पक्राउ पर्नेहरूमा भजनी नगरपालिका–४ का २५ वर्षीय मनोज चौधरी र २१ वर्षीय बिक्रम चौधरी तथा घोडाघोडी नगरपालिका–१२ का २१ वर्षीय विशाल चौधरी र २८ वर्षीय हनुमान चौधरी रहेका छन्।

प्रहरीका अनुसार, भारतबाट आउँदै गरेको से ३ प ९२६३ नम्बरको मोटरसाइकललाई जाँच गर्दा चालक मनोज चौधरी र पछाडि सवार बिक्रम चौधरीको साथबाट ३ ग्राम ९६० मिलिग्राम लागूऔषध बरामद भएको थियो। त्यसैगरी, ग ६ प ८३७९ नम्बरको अर्को मोटरसाइकलमा सवार चालक विशाल चौधरी र पछाडि बसेका हनुमान चौधरीको साथबाट १ ग्राम ७१० मिलिग्राम लागूऔषध फेला परेको थियो।

इलाका प्रहरी कार्यालय, पृथ्वीपुरबाट खटिएको प्रहरी टोलीले उनीहरूको साथबाट जम्मा ५ ग्राम ६७० मिलिग्राम लागूऔषध र दुवै मोटरसाइकल नियन्त्रणमा लिएको छ। पक्राउ परेका चारै जनामाथि थप अनुसन्धान भइरहेको प्रहरीले जनाएको छ।