हुम्लामा तीन दिनदेखि ११ वर्षीया बालिका बेपत्ता

 हुम्ला । हुम्लाको सिमकोट गाउँपालिका–७, धारापोरीबाट एक ११ वर्षीया बालिका तीन दिनदेखि बेपत्ता भएकी छन्। जेठ २६ गतेदेखि हराइरहेकी सुनसरी सिंहको खोजीका लागि नेपाल प्रहरीले विशेष टोली परिचालन गरेको छ।

जिल्ला प्रहरी कार्यालय, हुम्लाका अनुसार बालिका विद्यालयबाट फर्केर साथीहरूसँग खेल्न गएकोमा रातिसम्म पनि घर नफर्किएपछि परिवारले खोजी सुरु गरेको थियो। परिवार र स्थानीयको प्रयास असफल भएपछि जेठ २७ गते प्रहरीमा उजुरी परेको थियो।

प्रहरी नायब उपरीक्षक शङ्कर पोखरेलका अनुसार, बेपत्ता बालिकाको खोजीका लागि जिल्ला प्रहरी कार्यालयबाट प्रहरी सहायक निरीक्षक जेवी सिंहको नेतृत्वमा र धारापोरी प्रहरी चौकीबाट संयुक्त टोली खटाइएको छ। बेपत्ता सिंह स्थानीय कर्णाली माध्यमिक विद्यालयमा कक्षा ४ मा अध्ययनरत रहेको प्रहरीले जनाएको छ। घटनाबारे थप अनुसन्धान र खोजी कार्य जारी रहेको पोखरेलले बताए।