प्रदेशका पहाडी क्षेत्रमा चट्याङसहित हल्कादेखि मध्यम वर्षाको सम्भावना

काठमाडौं।  हाल नेपालमा पश्चिमी वायु, स्थानीय वायु र बङ्गालको खाडीबाट आएको जलवाष्पयुक्त हावाको प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।

महाशाखाका अनुसार अहिले देशको पहाडी भूभागमा आंशिकदेखि सामान्य बदली देखिएको छ भने बाँकी भूभागमा मौसम मुख्यतया सफा रहेको छ। गण्डकी र लुम्बिनी प्रदेशका केही स्थानहरूमा चट्याङसहित हल्का वर्षा भइरहेको जानकारी दिइएको छ।

आज दिउँसो लुम्बिनी प्रदेशसहित देशका अधिकांश पहाडी क्षेत्रहरूमा आंशिकदेखि सामान्य बदली रहनेछ। यी क्षेत्रका थोरै स्थानहरूमा चट्याङसहित हल्कादेखि मध्यम वर्षा हुनसक्ने सम्भावना रहेको छ। त्यस्तै, उच्च पहाडी तथा हिमाली भेगका केही स्थानहरूमा हल्का वर्षासँगै हिमपातको सम्भावना पनि रहेको महाशाखाले जनाएको छ।

आज रातिको लागि पनि बागमती, गण्डकी लगायत अन्य प्रदेशका पहाडी भूभागहरूमा चट्याङसहित हल्कादेखि मध्यम वर्षाको सम्भावना छ। यसैगरी, उच्च हिमाली भेगहरूमा हल्का वर्षासहित हिमपातको सम्भावना कायम रहेको छ।

आज सूर्योदय बिहान ५:०९ बजे भएको थियो भने सूर्यास्त साँझ ६:५३ बजे हुने मौसम पूर्वानुमान महाशाखाले जनाएको छ।