नयाँ गभर्नरले गरे आफ्नो दस्तखतवाला नोट छाप्ने निर्णय

नेपाल राष्ट्र बैंकका नवनियुक्त गभर्नर डा. विश्वनाथ पौडेलले पाँच सय र हजारका नयाँ नोट छाप्ने पहिलो निर्णयमा हस्ताक्षर गरेका छन् ।
सर्वोच्च अदालतमा प्रधानन्यायाधीश प्रकाशमान सिंह राउतबाट सपथ लिएलगत्तै बालुवाटास्थित केन्द्रीय कार्यालय पुगेर पदभार ग्रहण गरेका उनले आफ्नो हस्ताक्षरसहितको नयाँ नोट छाप्ने निर्णय स्वीकृत गरेका हुन् ।
हिजो साँझ बसेको क्याविनेटले अर्थशास्त्री पौडेललाई केन्द्रीय बैंकको १८औँ गभर्ननर नियुक्त गरेको थियो । उनले आज सिंहदरबार पुगेर अर्थमन्त्री विष्णुप्रसाद पौडेलसँग पनि भेट गरेका छन् । भेटमा मौद्रिक नीति र वित्त नीति निर्माणमा सहकार्य गर्नेबारे छलफल भएको बताइन्छ ।