आजकाे माैसम :  देशका विभिन्न भु-भागमा वर्षा र हावाहुरीको सम्भावना

काठमाडौँ।  हाल देशमा पश्चिमी वायु तथा स्थानीय वायुको प्रभाव सक्रिय रहेको छ भने बंगालको खाडी र अरब सागरबाट आएको जलवाष्पयुक्त हावाले समेत मौसममा आंशिक प्रभाव पारेको मौसम पूर्वानुमान महाशाखाले जनाएको छ।

महाशाखाका अनुसार हाल कोशी, गण्डकी लगायत देशका पहाडी भू-भागहरूमा आंशिकदेखि सामान्य बदली छ भने बाँकी भू-भागमा मौसम मुख्यतया सफा रहेको छ। देशका विभिन्न भागमा मेघगर्जन, चट्याङसहित हल्का वर्षा भइरहेको छ।

सोमबारका लागि मौसम पूर्वानुमानमा कोशी, बागमती, गण्डकी र लुम्बिनी प्रदेशका पहाडी भू-भागमा आंशिकदेखि सामान्य बदली रहनेछ। ती क्षेत्रमा र अन्य केही भागमा मेघगर्जन, चट्याङसहित हल्कादेखि मध्यम वर्षाको सम्भावना रहेको महाशाखाले जनाएकाे छ।

त्यस्तै, देशका उच्च पहाडी तथा हिमाली क्षेत्रमा एक-दुई स्थानमा हल्का वर्षा तथा हिमपातको सम्भावना पनि देखिएको छ। साथै मधेस प्रदेश, कोशी, गण्डकी, लुम्बिनी र सुदूरपश्चिम प्रदेशका तराई भू-भागका थोरै स्थानमा हावाहुरीको सम्भावना रहेको मौसमविद्हरूले बताएका छन्।

महाशाखाले वर्षा र हावाहुरीका कारण दैनिक जनजीवन, कृषि, स्वास्थ्य, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन र पूर्वतयारी गर्न सर्वसाधारणलाई आग्रह गरेको छ।