सव डिभिजन वन कार्यालय स्तरीय योजना तर्जुमा गोष्ठी सम्पन्न

चौकुने। चौकुने सव-डिभिजन वन कार्यालय गुटुको आयोजनामा सव डिभिजन वन कार्यालय स्तरीय योजना तर्जुमा गोष्ठी आज चौकुने गाउँपालिका गुटुको सभा हलमा सम्पन्न भएको छ । चौकुने ८ गुटुस्थित सव डिभिजन वन कार्यालय गुटुको आयोजनामा भएको योजना तर्जुमा गोष्ठीमा आगामी आर्थिक वर्ष २०८२/०८३ का लागि वन उपभोक्ता समूह र कबुलियती वन समूहमा आवश्यक पर्ने योजना तथा बजेटका विषयमा छलफल भएको थियो ।

सव डिभिजन वन कार्यालय गुटुका वन अधिकृत दिभ्यांसु पाण्डेले आर्थिक बर्ष २०८२।०८३ को चौकुने सव डिभिजन कार्यालयको प्रस्तावित कार्यक्रमहरु सार्बजनिक गर्दै हरेक विकास निमार्ण गर्दा विकास र वन, वन्यजन्तु संरक्षणलाई सन्तुलित बनाएर लैजानुपर्ने र हरेक सामुदायिक वनको पाना नम्बर अनिवार्य रुपमा बनाउनु पर्ने बताउनुभयो । हरेक वर्ष हुने वन डढेलोलाई नियन्त्रण गर्न वन समूहलाई उहाँले आग्रह समेत गर्नुभयो ।

वन अधिकृत पाण्डेले आर्थिक रुपमा सबल सामुदायिक वन उपभोक्ता समूहले हरेक वर्षको तीन महिना (फागुन, चैत र बैशाख) का लागि डढेलो नियन्त्रण गर्न अग्निदस्ता खटाउनुपर्ने पनि बताउनुभयो । वन समूहले अग्नि दस्तालाई उचित पारिश्रमिक दिईनुपर्ने र डिभिजन वन कार्यालयबाट दुर्घटना तथा जीवनविमाको व्यवस्था रहेको समेत जानकारी गराउनुभयो ।

वन अधिकृत पाण्डेले प्रस्ताबित कार्ययोजनाहरुमा बिरुवा उत्पादन, नर्सरी मर्मत घाटगद्दीमा मर्मत सुधार, अग्नि रेखा, भवन स्तर उन्नति, ट्रेन्च निर्माण, बन अतिक्रमण हटाई तारबार सहित बृक्षारोपण लगायतका कार्यक्रम उल्लेख गर्नुभयो । सव डिभिजन वन कार्यालय भित्रका २६ वटा सामुदायिक वन उपभोक्ता समुहका पदाधिकारी हरुको उपस्थिति रहेको थियो । कार्यक्रमको सहजीकरण सब डिभिजन बन कार्यालय गुटुका रेन्जर रिता पाण्डेले गर्नु भएको थियो ।