यू–१९ क्रिकेट: अन्तिम खेलमा अफगानिस्तानमाथि नेपालको सानदार जित

काठमाडौँ । आईसीसी यू–१९ विश्वकप छनोटको तयारीस्वरूप अफगानिस्तानसँगको अभ्यास शृङ्खलाको अन्तिम खेलमा नेपालले शानदार जित हात पारेको छ। मूलपानी क्रिकेट मैदानमा आज सम्पन्न खेलमा नेपालले अफगानिस्तानलाई डिएलएस (DLS) मेथडका आधारमा ८५ रनले पराजित गरेको हो।

नेपालले पहिलो ब्याटिङ गर्दै ४४.५ ओभरमा १९१ रन बनाउँदै अलआउट भएको थियो। नेपालका लागि साहिल पटेलले ४६ रन र नीरजकुमार यादवले ४२ रनको योगदान दिए। अफगानिस्तानका हफीज जाद्रानले ४ विकेट लिए।

१९२ रनको लक्ष्य लिएर जवाफी ब्याटिङमा उत्रिएको अफगानिस्तानको टोलीले २०.१ ओभरमा ६ विकेट गुमाएर ४६ रन बनाएको अवस्थामा वर्षाका कारण खेल रोकियो। त्यसपछि खेल पुनः सुरु हुन नसकेपछि डिएलएस नियमअनुसार नेपाल विजयी भयो।

नेपालका बलर अपराजित पौडेलले २ विकेट, भने दयानन्द मण्डल, विपिन शर्मा, सन्तोष यादव र अशोक धामीले समान १/१ विकेट लिएका थिए। अफगानिस्तानका फैसल शिनोजादाले १६ र अजिजुल्लाह मिया खिलले नटआउट १५ रन बनाए।

यद्यपि, शृङ्खला अफगानिस्तानले नै २–१ ले जितेको छ। अफगानिस्तानले पहिलो खेलमा नेपाललाई १३० रनले र दोस्रो खेलमा १ रनले हराएको थियो।

यो अभ्यास शृङ्खला आगामी आईसीसी यू–१९ विश्वकप एसिया छनोट प्रतियोगिताको तयारीका लागि आयोजना गरिएको हो। उक्त छनोट प्रतियोगिता आइतवारदेखि काठमाडौँको मूलपानी मैदानमा सुरु हुनेछ, जसमा नेपाल, अफगानिस्तान, युएई, हङकङ र ओमान सहभागी हुनेछन्।