सुर्खेतमा प्रजिअलाई स्वागत

सुर्खेत – सुर्खेतका प्रमुख जिल्ला अधिकारी (प्रजिअ) जगदिश्वर उपाध्यायलाई सुर्खेत उद्योग वाणिज्य संघले भव्य स्वागत गरेको छ। संघद्वारा आयोजित स्वागत, परिचयात्मक तथा अन्तरक्रिया कार्यक्रम बिरेन्द्रनगरमा सम्पन्न भएको हो।

कार्यक्रममा संघका पदाधिकारीहरूले बिरेन्द्रनगरको समग्र सुरक्षा, बजार व्यवस्थापन र निजी क्षेत्रको प्रवर्द्धनका विषयमा विभिन्न महत्वपूर्ण सुझाव प्रस्तुत गरेका थिए।

संघले प्रमुख जिल्ला अधिकारी समक्ष रात्रिकालीन बजार सेवा सञ्चालन, सुरक्षा व्यवस्थापन सुधार, बजार क्षेत्रमा सीसीटीभी निगरानी प्रभावकारी बनाउने, लागूपदार्थ कारोबार नियन्त्रण, १३२ केभी विद्युत् प्रसारण लाइन शीघ्र सञ्चालन, ड्राइभिङ लाइसेन्स वितरण सहज बनाउने तथा अव्यवस्थित सडक व्यवसायलाई व्यवस्थापन गर्नुपर्ने माग राखेको थियो। साथै, निजी क्षेत्रको लगानीलाई सुरक्षित गराउने प्रभावकारी सुरक्षा नीति अवलम्बन गर्नुपर्ने विषय पनि उठाइएको थियो।

प्रमुख जिल्ला अधिकारी उपाध्यायले आफ्नो कार्यकालमा प्रशासन, सुरक्षा र विकासलाई प्रभावकारी बनाउँदै निजी क्षेत्रसँग सहकार्य गरेर अघि बढ्ने प्रतिबद्धता व्यक्त गर्नुभयो। उहाँले सुर्खेतको समग्र विकासका लागि सबै पक्षसँग सहकार्य गर्ने आश्वासनसमेत दिनुभएको छ।

कार्यक्रममा संघका पदाधिकारी, सुरक्षाकर्मी, स्थानीय उद्यमी तथा विभिन्न क्षेत्रका प्रतिनिधिहरूको उपस्थिति रहेको थियो। प्रमुख जिल्ला अधिकारी उपाध्यायको कार्यकाल सफल होस् भन्ने शुभकामना व्यक्त गर्दै कार्यक्रम समापन गरिएको थियो।