भाटभटेनी सुपरमार्केट लुटपाट घटनामा संलग्न ९ जना पक्राउ

काठमाडौं – भाटभटेनी सुपरमार्केटमा शुक्रबार लुटपाट गर्ने ९ जनालाई प्रहरीले पक्राउ गरेको छ। राजावादी समूहसहितको संयुक्त आन्दोलनका क्रममा कोटेश्वरस्थित सुपरमार्केटमा तोडफोड गर्दै लुटपाट गरेको आरोपमा उनीहरूलाई पक्राउ गरिएको हो।

पक्राउ पर्नेहरूमा धनुषा, सर्लाही, नुवाकोट, सुनसरी, काठमाडौं, सिन्धुपाल्चोक, सिन्धुलीलगायतका जिल्लाका व्यक्तिहरू रहेका छन्। उनीहरूमध्ये एकजना भारतको बिहार राज्यका पनि रहेका छन्।

काठमाडौं उपत्यका अपराध अनुसन्धान कार्यालयको टोलीले शनिबार र आइतबार उनीहरूलाई नियन्त्रणमा लिएको हो। कार्यालयका प्रहरी उपरीक्षक अंगुर जिसीका अनुसार पक्राउ परेकाहरू कोटेश्वर क्षेत्रमा बस्दै आएका थिए।

प्रहरीले लुटपाटमा संलग्न अन्य व्यक्तिहरूको खोजीकार्य जारी रहेको जनाएको छ।