आगजनी तथा लुटपाटप्रति नेपाल चेम्बर अफ कमर्सको भर्त्सना

काठमाडौं – नेपाल चेम्बर अफ कमर्सले शुक्रबार तीनकुने क्षेत्रमा भएको प्रदर्शनका क्रममा निजी तथा सार्वजनिक सम्पत्ति, सञ्चारगृहमा भएको तोडफोड, आगजनी तथा लुटपाटप्रति गम्भीर आपत्ति जनाएको छ।

चेम्बरले यस्ता  गतिविधिले अर्थतन्त्रलाई थप धराशायी बनाउने भन्दै संयमित रहन आग्रह गरेको छ। साथै, प्रदर्शनका क्रममा नागरिक र व्यवसायीको नैसर्गिक अधिकार हनन भएको भन्दै पीडितहरूलाई उचित क्षतिपूर्ति दिन सरकारसँग माग गरेको छ।

चेम्बरले जारी गरेको विज्ञप्तिमा भनिएको छ, “सार्वजनिक र निजी सम्पत्ति तथा सञ्चारगृहमा क्षति पुगेको घटनाको घोर निन्दा गर्दै पीडितहरूले उचित क्षतिपूर्ति पाउनुपर्ने माग गर्दछौं।”

यसअघि, नेपाल उद्योग वाणिज्य महासंघ र नेपाल उद्योग परिसंघले पनि घटनाका दोषीलाई कारबाही र पीडितलाई क्षतिपूर्ति दिनुपर्ने माग गरिसकेका छन्।