महोत्तरीमा १० वर्षीया बालिकालाई जबर्जस्ती करणी प्रयासको आरोपमा सशस्त्र प्रहरीका सई पक्राउ

महोत्तरीमा १० वर्षीया बालिकालाई जबर्जस्ती करणी प्रयास गरेको आरोपमा सशस्त्र प्रहरीका सई धर्मेन्द्रसिंह महतो पक्राउ परेका छन्। शुक्रबार बिहान मन्दिरमा पूजा गर्न गएकी बालिकालाई रेल्वे ट्र्याक सुरक्षा पोस्टमा कार्यरत सई महतोले करणी प्रयास गरेको आरोप स्थानीयले लगाएका छन्।

बालिका चिच्याएपछि स्थानीयहरू भेला भई विरोध गरेका थिए। लोहरपटी गाउँपालिकाका वडाध्यक्ष श्याम यादवका अनुसार स्थानीयले घटनाको विरोध गर्दै सशस्त्र प्रहरी पोस्ट घेराउ गरेका थिए।

सशस्त्र प्रहरीका सहप्रवक्ता डीएसपी शैलेन्द्र थापाले आरोपी सईलाई आवश्यक कारबाहीका लागि नेपाल प्रहरीको जिम्मा लगाइएको जानकारी दिएका छन्।

नेपाल प्रहरीले पीडित पक्षबाट जाहेरी प्राप्त भइनसकेको बताउँदै जाहेरी आएपछि थप कानुनी प्रक्रिया अघि बढाइने जनाएको छ। वडाध्यक्ष यादवका अनुसार सई महतो पहिले पनि ती बालिकाको घरमा आउजाउ गर्ने गरेको बताइएको छ।