श्रमदानबाटै म्याग्दीमा सिँचाइ योजना मर्मत, १९० रोपनी जमिनलाई राहत

म्याग्दीको बेनी नगरपालिका–४ थामडाँडाका स्थानीयहरूले श्रमदान गर्दै सिँचाइ योजना मर्मत गरेका छन्। चार वर्षअघि निर्माण भएको बालमखोला सिँचाइ आयोजनाअन्तर्गत थामडाँडा र बदमखोरीया क्षेत्रको पाइपलाइनमा समस्या देखिएपछि उपभोक्ताहरूले आठ दिनसम्म श्रमदान गरी मर्मत गरेका हुन्।

बालमखोला सिँचाइ आयोजना उपभोक्ता मूल समितिका सचिव धनकाजी सुनारका अनुसार, गाउँ नजिक रहेको रिजर्भ ट्याङ्कीबाट करिब पाँच सय मिटर दुरीको पाइपलाइन परिवर्तन गरी नयाँ पाइप विस्तार गरिएको छ।

यस कार्यमा ३५ घरधुरीका प्रत्येक परिवारबाट एक–एक जना श्रमदानमा सहभागी भएका थिए। यसअघि दुई इञ्चको पाइप प्रयोग गरिएकोमा बारम्बार समस्या आउने भएपछि नयाँ मार्ग निर्माण गरी डेढ इञ्चको पाइप थप गरिएको समितिले जनाएको छ।

श्रमदानबाट सफलतापूर्वक सम्पन्न सिँचाइ योजना मर्मतपछि ३५ घरधुरीका करिब १९० रोपनी खेतीयोग्य जमिनमा सिँचाइको सुविधा पुगेको छ। स्थानीयको एकताले आयोजना मर्मत सम्भव भएको बताउँदै समितिले आगामी दिनमा सिँचाइ व्यवस्थापनलाई थप प्रभावकारी बनाउने योजना अघि सारेको छ।