आजको मौसम : पहाडी क्षेत्रमा आंशिक बदली, तराईमा हल्का हुस्सु लाग्ने सम्भावना

देशभर मौसमको अवस्था पश्चिमी न्यून चापीय प्रणालीको आंशिक प्रभावमा रहेको जल तथा मौसम पूर्वानुमान महाशाखाले जनाएको छ। कोशी, गण्डकी, कर्णाली र सुदूरपश्चिम प्रदेशका पहाडी भागहरूमा आंशिक बदली रहेको छ भने अन्य भूभागमा मौसम सफा छ।

आज दिउँसो कोशी र गण्डकी प्रदेशका पहाडी क्षेत्रमा आंशिक बदली रहनेछ भने अन्य स्थानहरूमा मौसम खुला रहने महाशाखाको पूर्वानुमान छ। राति कोशी प्रदेशका पहाडी भागहरूमा आंशिक बदली रहने सम्भावना छ भने बाँकी क्षेत्रको मौसम सामान्यतया सफा रहनेछ।

महाशाखाले बिहीबार बिहान तराईका केही स्थानमा हल्का हुस्सु लाग्ने सम्भावना रहेको जनाएको छ। यसले दैनिक जनजीवन, स्वास्थ्य, सडक तथा हवाई उडानमा आंशिक प्रभाव पार्न सक्ने भएकाले आवश्यक सतर्कता अपनाउन आग्रह गरिएको छ।