नेपाल पेटाइम मोबाइल वालेटको इजाजत पत्र खारेज, ३० दिनभित्र ग्राहकको लेनदेन मिलाउन निर्देशन

राष्ट्र बैंकले नेपाल पेटाइमलाई ३० दिनभित्र ग्राहकहरूसँगको बाँकी लेनदेन मिलाउन निर्देशन दिएको छ। यसको अर्थ, यदि नेपाल पेटाइमका ग्राहकहरूसँग कुनै रकम बाँकी छ भने, तिनीहरूले तोकिएको अवधिभित्र आफ्नो कारोबार पूरा गर्नुपर्नेछ।

नेपाल पेटाइमले २०७६ साल भदौ १९ गते नेपाल राष्ट्र बैंकबाट भुक्तानी सेवा प्रदायकको रूपमा इजाजत पत्र लिएको थियो। तर, लामो समयदेखि सेवा बन्द रहेको, एप्लिकेसन प्ले स्टोरमा उपलब्ध नभएको र नियमअनुसार संस्थागत सुशासन कायम गर्न नसकेको भन्दै इजाजत खारेज गरिएको हो।

राष्ट्र बैंकले भुक्तानी तथा फर्स्यौट ऐन २०७५ को दफा १३ (४) अनुसार नवीकरण नगरिएको भन्दै नेपाल पेटाइमको इजाजत पत्र खारेज गरिएको उल्लेख गरेको छ।

यस निर्णयसँगै नेपाल पेटाइमले अब डिजिटल भुक्तानी सेवा सञ्चालन गर्न पाउने छैन। ग्राहकहरूलाई उपलब्ध रकम फिर्ता गर्नसमेत बैंकले निर्देशन दिएको छ।