बाजुराकाे बिहे भोजमा झडप, २९ वर्षीय युवकको मृत्यु

बाजुराको बुढीगंगा नगरपालिका-८ मोटाबाडामा बिहेमा गएका दुई समूहबीच झडप हुँदा एक जनाको मृत्यु भएको छ। झडपमा बुढीगंगा-८ डुग्रीतोलाका अन्दाजी २९ वर्षीय रणबहादुर थापाको मृत्यु भएको हो।

जिल्ला प्रहरी कार्यालय बाजुराका सूचना अधिकारी जनक बोहोराका अनुसार बिहीबार राति बिहेको निम्तो खान गएका दुई समूहबीच भनाभन भएपछि झडप भएको थियो। सो क्रममा थापा गम्भीर घाइते भएका थिए। उनलाई उपचारका लागि अछामको बयालपाटा अस्पताल लगिएको थियो, जहाँ उपचारका क्रममा उनको मृत्यु भयो।

प्रहरीका अनुसार घटनामा संलग्न रहेको आशंकामा तीन जनालाई पक्राउ गरिएको छ। पक्राउ पर्नेमा बुढीगंगा-७ वाइलका दीर्घ विष्ट, खेम विष्ट र लोकेन्द्र खड्का रहेका छन्। अनुसन्धानका लागि उनीहरूलाई जिल्ला प्रहरी कार्यालयमा राखिएको छ।

मृतक थापाको शव पोष्टमार्टमका लागि जिल्ला अस्पताल ल्याउने तयारी भइरहेको छ। प्रहरीका अनुसार घटनाको विस्तृत अनुसन्धान जारी रहेको छ।