चन्द्रनिगापुरमा विद्युत् चुहावट गर्ने ७ जना पक्राउ

नेपाल विद्युत प्राधिकरण (नेवि प्रा) चन्द्रनिगापुर शाखाले विद्युत् चुहावट गर्ने सात जनालाई पक्राउ गरेको छ। पक्राउ परेका व्यक्तिहरूले मिटरको शील तोडेर, हुकिङ तथा तारमा सिधैँ जडान गरी अवैध रूपमा विद्युत् प्रयोग गरिरहेका थिए।

प्राधिकरणका अनुसार, जिल्लाको वृन्दावन र चन्द्रपुर नगरपालिकाका विभिन्न स्थानमा विशेष निगरानीका क्रममा बुधबार राति उनीहरूलाई पक्राउ गरिएको हो। नेपाल प्रहरी तथा सशस्त्र प्रहरीको सहयोगमा गरिएको कारबाहीमा ती व्यक्तिहरू रंगेहात समातिएको नेपाल विद्युत् प्राधिकरण वितरण केन्द्र चन्द्रनिगापुरका प्रमुख इन्जिनियर धीरेन्द्र यादवले जानकारी दिए।

विद्युत् चुहावटले प्राधिकरणलाई ठूलो आर्थिक क्षति पुर्याउने मात्र नभई, आगलागी तथा अन्य दुर्घटनाको जोखिमसमेत बढाउने इन्जिनियर यादवले बताए। यसकारण, चुहावट रोकथामका लागि कडा कदम चाल्नुपर्ने आवश्यकतामा उनले जोड दिए।

विद्युत् चोरी नियन्त्रणका लागि प्राधिकरणले स्थानीय प्रशासन, सुरक्षाकर्मी तथा उपभोक्तासँग सहकार्य गर्दै निगरानीलाई अझै कडाइ गर्ने जनाएको छ। साथै, यदि कसैले यस्ता अवैध गतिविधि देखेमा तुरुन्तै जानकारी दिन अनुरोध गरिएको छ।