आज ७५ औँ प्रजातन्त्र दिवस, विभिन्न कार्यक्रम गरी मनाइँदै

नेपालभर विभिन्न कार्यक्रम गरी ७५ औँ प्रजातन्त्र दिवस मनाइँदै छ। दिवसको अवसरमा सैनिक मञ्च टुँडिखेलमा विशेष समारोह आयोजना गरिने भएको छ।

समारोहमा राष्ट्रपति, उपराष्ट्रपति, प्रधानमन्त्री, प्रधानन्यायाधीश, सभामुख, जनप्रतिनिधि, राष्ट्रसेवक कर्मचारी, सुरक्षाकर्मी, सार्वजनिक तथा सामुदायिक संघसंस्था तथा शैक्षिक प्रतिष्ठानका पदाधिकारी, नागरिक समाजका विशिष्ट व्यक्तित्वहरू सहभागी रहनेछन्।

नेपाली सेनाले सैनिक मञ्च टुँडिखेलमा बिहान सूर्योदयसँगै विगुल बजाउने तथा तोप र बन्दुकको बढाईंको कार्यक्रम राखिएको छ। सेनाको हेलिकोप्टरबाट ‘राष्ट्रिय प्रजातन्त्र दिवस, २०८१’ अंकित व्यानर चक्रपथ वरपर प्रदर्शन गरिनेछ। साथै, हेलिकोप्टरबाट पुष्पवृष्टि र झण्डा प्रदर्शन गर्ने कार्यक्रम पनि समावेश छ।

विक्रम संवत् २००७ फागुन ७ गते १०४ वर्षसम्म चलेको राणा शासन अन्त्य भई नेपालमा प्रजातन्त्रको स्थापनाको घोषणा भएको दिनको स्मरणमा यो दिवस मनाउने गरिन्छ। यस दिनलाई नेपालमा जनताले अधिकार प्राप्त गरेको ऐतिहासिक दिनको रूपमा लिइन्छ।