दार्चुलाको मालिकार्जुनमा जीप दुर्घटना :  ७ जनाको मृत्यु, ६ जना घाइते

दार्चुलाको मालिकार्जुनमा आज (शुक्रबार) बिहान जीप दुर्घटना हुँदा सात जनाको मृत्यु भएको छ । भने अन्य ६ जना घाइते भएका छन् ।

शुक्रबार बिहान करिब ४ बजे शैल्यशिखर नगरपालिका-६ मालिकार्जुनबाट गोकुलेतर्फ जाँदै गरेको म १ ज ३३८ नम्बरको जीप दुर्घटना भएको जिल्ला प्रहरी कार्यालय दार्चुलाले जनाएको छ ।

घटनास्थल सदरमुकाम खलंगाबाट झण्डै ४० किलोमिटर टाढा पर्छ ।

प्रहरीकाअनुसार स्थानीय मालिकार्जुन मन्दिरमा लागेको जात्रा हेरेर फर्किने क्रममा दर्शनार्थी बोकेको जीप दुर्घटनामा परेको हो ।

दुर्घटनामा परि मृत्यु हुनेहरुको सनाखत नभएको प्रहरीले जनाएको छ ।
घाइतेलाई स्थानीय प्रहरीको सहयोगमा उपचारका लागि गोकुले अस्पताल पठाइएको छ । दुर्घटनास्थलमा दार्चुलाका डीएसपीको नेतृत्वमा प्रहरी टोली गइरहेको प्रहरीले जनाएको छ ।

जीप सडकबाट करीब १०० मिटर तल खसेको छ । दुर्घटनाको कारण भने खुलेको छैन ।
दुर्घटनाबारे बाँकि अनुसन्धान भैरहेको छ । थप विवरण आउन बाँकि छ ।