सुर्खेत देउती बज्यै मन्दिरका पुजारीकी पत्नी मृत फेला

सुर्खेतको वीरेन्द्रनगरमा रहेको कर्णाली प्रदेशकै पर्यटकीय तथा धार्मीक स्थलको रुपमा परिचीत गंगामाला देउती बज्यै मन्दिरमा आज बिहान एक महिला मृत फेला परेकी छन् । मृत फेला पर्नेमा सोहि मन्दिरका पुजारी वीरेन्द्रनगर नगरपालिका ११ बस्ने रुद्रबहादुर राजिकी श्रीमति अन्दाजी बर्ष ५० की सरस्वती राजी रहेको जिल्ला प्रहरी कार्यालय सुर्खेतले जनाएको छ ।

जिल्ला प्रहरी कार्यालय सुर्खेतका अनुसार उनी मन्दिरको मुल ढोकाको भित्रपट्टि रहेको फलामको हत्कडीमा झुण्डिएकोमा अवस्थामा आज (बुधवार) बिहान फेला परेकी हुन् । ‘म बिहान साढे ५ बजेदेखि घटनास्थलमै छु । हामीलाई घटनाको जानकारी बिहान ५ बजेतिर आएको थियाो । घटनाको प्रकृति हेर्दा कुनै शंकास्पद देखिएको छैन् । तर मादक पदार्थ सेवन बढी नै गरे जस्तो देखिएको छ ।,’ सुर्खेतका प्रहरी उपरीक्षक खड्काले भने, ‘बाँकी अनुसन्धान हुँदैछ । अनुसन्धानबाट घटनाको बारेमा थप जानकारी आउला ।’ खड्काका अनुसार प्रहरीले शव पोष्टमार्टमका लागि प्रदेश अस्पतालको शव गृहमा पठाउने तयारी गरेको छ । पुजारी नै मृत अवस्थामा भेटिएपछि आज बिहानैदेखि देउती बज्यै मन्दिर दर्शनको कार्य अस्थायी रूपमा रोकिएको छ ।