सेनाको हेलिकप्टरद्धारा सुत्केरीको उद्धार

बाजुरा जिल्लाको हिमाली गाउँपालिका-५ की २२ वर्षीया प्रेमकला रोकायाको जिल्ला अस्पताल बाजुराबाट सेनाको हेलिकप्टरमार्फत उद्धार गरिएको छ ।

रोकायको स्वास्थ्यमा समस्या देखिएपछि आज दिउँसो नेपाली सेनाको हेलिकप्टरद्धारा थप उपचारका लागि कर्णाली प्रदेश अस्पताल कालागाउँमा ल्याएइको हो ।

सुत्केरी रोकायाको एउटा बच्चा गाउँमै जन्माएको र अर्को बच्चा जिल्ला अस्पताल बाजुरामा शल्यक्रिया गरेर जन्माएको भए पनि पेटमा समस्या आएकाले नेपाली सेनाको हेलिकप्टरमार्फत उद्धार गरिएको जिल्ला प्रशासन कार्यालय बाजुराले जनाएको छ ।

प्रमुख जिल्ला अधिकारी मेघनाथ पाध्याका अनुसार जिल्ला अस्पताल बाजुराले सुत्केरीको अवस्था जटिल भएकाले महिला तथा बालबालिका मन्त्रालयको राष्ट्रपति महिला उत्थान कार्यक्रममार्फत उद्धार गरिएको हो ।

सुत्केरी रोकायाको यही कार्त्तिक २३ गते सामान्य अवस्थामा एक बच्चा घरमै जन्माएकी थिइन भने, उनको स्वास्थ्यमा समस्या भएपछि हिमाली गाउँपालिकाको एम्बुलेन्समा जिल्ला अस्पताल बाजुरामा ल्याइएको थियो ।

बच्चाको अवस्था भने सामान्य रहेको अस्पतालले जनाएको छ ।