संविधानको धारा ७६ (२) अनुसारकै सरकार बन्छ: कोइराला

नेपाली कांग्रेसका नेता शेखर कोइरालाले अब बन्ने सरकार संविधानको धारा ७६ को उपधारा २ अनुसारकै हुने बताएका छन्।

जोरपाटीमा मंगलबार खगेन्द्र नवजीवन विशेष विद्यालयको छात्रवृत्ति वितरण कार्यक्रममा कोइरालाले यस्तो बताएका हुन्।

बहुमत गुमाइसकेको भन्दै एमाले-कांग्रेसले राजीनामा माग गरिरहेको बेला हालका प्रधानमन्त्री पुष्पकमल दाहालले भने असार २८ गते विश्वासको मत लिने तयारी गरेका छन्।

दाहालले विश्वासको मत जुटाउन नसके संविधान धारा ७६ को उपधारा ९३० मा अनुसारको सरकार बन्न सक्ने विषयमा बहस भइरहेका बेला कोइरालाले आफ्नो धारणा राखेका हुन्।

‘अबको सरकार संविधानको धारा ७६ को २ अनुसार हुन्छ कि ३ अनुसार भन्ने विषय मिडियामा आइरहेको छ। म तपाईँहरूलाई विश्वास दिलाउन चाहन्छु-यसमा अलमल हुने काम छैन, अब बन्ने सरकार ७६ (२) कै सरकार हुन्छ,’ उनले थपे, ‘यहाँ धेरै मिडियाहरूले मजा लागेको वा के हो मैले बुझ्न सकेको छैन, तर अब बन्ने सरकार संविधानको धारा ७६ को उपधारा २ अनुसारकै हुन्छ भन्ने कुरा तपाईँहरूको माझमा राख्न चाहन्छु।’