सुर्खेत । नेपाली कांग्रेस वीरेन्द्रनगर–३ मा वडा अधिवेशनको प्रक्रियालाई लिएर विवाद चुलिएको छ। असन्तुष्ट पक्षले अधिवेशनमा धाँधली र एकलौटी प्रक्रिया अपनाइएको आरोप लगाउँदै बालकृष्ण हमाल चालिसेको नेतृत्वमा समानान्तर वडा समिति गठन गरेको जनाएको छ।

असन्तुष्ट पक्षका अनुसार वडा नम्बर ३ का ४०२ जना क्रियाशील सदस्यको नाम नवीकरण तथा नामावलीबाट हटाइएको विषयमा निर्वाचन अधिकृत र जिल्ला कार्यसमितिको ध्यानाकर्षण गराइएको थियो। समस्या समाधानका लागि प्रक्रिया रोक्ने आश्वासन दिइए पनि एकपक्षीय रूपमा समिति तथा क्षेत्रीय प्रतिनिधि चयन गरिएको आरोप उनीहरूले लगाएका छन्।

हमालले स्थानीय तथा निष्ठावान् कार्यकर्तालाई पाखा लगाइएको दाबी गर्दै बाध्य भएर समानान्तर समिति गठन गर्नुपरेको बताएका छन्। उनी आगामी स्थानीय तह निर्वाचनमा वडाध्यक्षका दाबेदारसमेत रहेको जनाइएको छ।