सुर्खेत। सुर्खेतको गोठीकाँडास्थित प्रतिमा होटलमा अन्दाजी २२ वर्षीय विशाल रावल मृत अवस्थामा फेला परेका छन्।

प्रहरी चौकी छेडाका इन्चार्ज यज्ञराज शाहीका अनुसार प्रहरी घटनास्थलतर्फ जाँदै गर्दा मृतकसँगै अर्को कोठामा बसेका साथीले उनको सास बाँकी रहेको भन्दै एम्बुलेन्समा राखेर वीरेन्द्रनगरतर्फ लैजाँदै थिए।

घटनाबारे जानकारी पाएपछि प्रहरीले होटलमा पुगेर अनुसन्धान सुरु गरेको थियो। अनुसन्धानका क्रममा होटलको शौचालयभित्र रहेको सेतो पाइपमा सल बाँधिएको अवस्थामा रावल फेला परेको बताइएको छ।

घटनाको अनुसन्धानका क्रममा प्रहरीले दुई जनालाई पक्राउ गरेको छ। पक्राउ पर्नेमा मृतकसँगै होटल गएको भनिएकी एक युवती र उनका साथी रहेका छन्।

घटनाको वास्तविक कारण खुल्न बाँकी रहेको छ। प्रहरीले घटनाबारे थप अनुसन्धान भइरहेको प्रहरीले जनाएको छ।