लाेकजंग शाही, सुर्खेत । वीरेन्द्रनगर नगरपालिका–१० अन्तर्गत गंगामाला टोलको सार्वजनिक सडक वर्षायामसँगै हिलाम्मे बनेपछि स्थानीयको दैनिकी कष्टकर भएको छ। सडकको दयनीय अवस्थाले विद्यार्थी, ज्येष्ठ नागरिक, बिरामी तथा सर्वसाधारणलाई आवतजावतमा सास्ती भोग्नुपरेको स्थानीयले बताएका छन्।

स्थानीयका अनुसार सडक मर्मतका लागि वडा कार्यालय तथा जनप्रतिनिधिलाई पटक–पटक जानकारी गराइए पनि आवश्यक पहल हुन सकेको छैन। सरकारी निकायबाट अपेक्षित काम नभएपछि स्थानीयले आफ्नै खर्चमा तीन लाख रुपैयाँभन्दा बढी रकम संकलन गरी सडक सुधारको प्रयास गरेका छन्।

स्थानीयले विकास योजनाको प्राथमिकतामाथि पनि प्रश्न उठाएका छन्। उनीहरूको आरोप अनुसार बस्तीभित्रको अत्यावश्यक सडक वर्षौंदेखि बेवास्तामा पर्दा आवश्यकता नभएको निजी प्लटिङ क्षेत्रतर्फ भने सरकारी बजेटबाट पक्की नाला निर्माण गरिएको छ। आरोप सत्य भए योजना छनोट, बजेट विनियोजन र कार्यान्वयन प्रक्रियामाथि गम्भीर प्रश्न उठ्ने स्थानीयको भनाइ छ।

स्थानीयले जनताको करबाट संकलित बजेट आधारभूत आवश्यकतामा खर्च हुनुपर्ने माग गर्दै सम्बन्धित निकायलाई स्थलगत अनुगमन गरी सडकको तत्काल सुधार गर्न आग्रह गरेका छन्।

गंगामाला टोलका बासिन्दाको प्रश्न छ– "कर तिर्ने जनता हिलोमा हिँड्ने, विकासको बजेट आखिर कसका लागि?"