रूपन्देहीको भैरहवा क्षेत्रमा आफूलाई जिल्ला प्रहरी कार्यालयको घुमुवा प्रहरी भनी परिचय दिँदै सर्वसाधारणलाई धम्क्याउने एक व्यक्ति पक्राउ परेका छन्। सिद्धार्थनगर नगरपालिका-१३ घर भई हाल ओमसतिया गाउँपालिका-४ मा बस्दै आएका ४९ वर्षीय राकेश प्रताप राणालाई प्रहरीले पक्राउ गरेको हो। उनले नक्कली रिभल्भर देखाएर सर्वसाधारणसँग १० हजार रुपैयाँ माग गरिरहेको सूचनाका आधारमा प्रहरी निरीक्षकको नेतृत्वमा खटिएको टोलीले उनलाई नियन्त्रणमा लिएको थियो। अभियुक्तको कोठा खानतलासी गर्दा नक्कली पेस्तोल, पाँच सय ग्राम गाँजा, सवारी चालक अनुमतिपत्र र नगद दुई हजार ६ सय रुपैयाँ बरामद भएको छ। घटनाबारे थप अनुसन्धान भइरहेको प्रहरीले जनाएको छ। नक्कली प्रहरी बनेर समाजमा त्रास फैलाउँदै अवैध असुली गर्ने यस्ता गतिविधिहरूले नागरिक सुरक्षामा चुनौती थपिरहेको सन्दर्भमा यस गिरफ्तारीलाई महत्त्वपूर्ण मानिएको छ।