पाकिस्तानमा ३१ जनाको ज्यान लिने हमलाका ‘मास्टरमाइन्ड’ पक्राउ

काठमाडौँ — पाकिस्तानका गृहमन्त्री मोहसिन नकवीले इस्लामाबादमा भएको आत्मघाती आक्रमणका मास्टरमाइन्ड (मुख्य योजनाकार) लाई पक्राउ गरिएको दाबी गरेका छन्। उक्त आक्रमणमा ३१ जनाको ज्यान गएको थियो।

शुक्रबार इस्लामाबादको इमामबाडा क्षेत्रमा रहेको एक शिया मस्जिदमा आत्मघाती बम आक्रमण भएको थियो। गृहमन्त्री नकवीले शनिबार आयोजित पत्रकार सम्मेलनमा उक्त आक्रमणका मुख्य योजनाकार आईएसआईएससँग सम्बन्धित एक अफगानी नागरिक रहेको बताएका हुन्। बीबीसी हिन्दीका अनुसार नकवीले आक्रमणको सम्पूर्ण योजना र तालिम अफगानिस्तानमै भएको दाबी गरेका छन्।

उनका अनुसार घटनासँग सम्बन्धित चार जनालाई पक्राउ गरिएको छ। ती व्यक्तिहरूले मस्जिदमा भएको आत्मघाती आक्रमणमा सहयोग गरेको आशंका गरिएको छ। पक्राउ परेकामध्ये एक जना आक्रमणको मास्टरमाइन्डसमेत रहेको गृहमन्त्री नकवीको भनाइ छ।

नकवीले भने, “हामीसँग अहिले हिरासतमा रहेका व्यक्तिहरूले आक्रमणकारीलाई कसरी पाकिस्तान ल्याइयो र कसरी तालिम दिइयो भन्ने सम्पूर्ण विवरण दिएका छन्।”

उनले पाकिस्तानमा सक्रिय आतंकवादी समूहहरूको जरो अफगानिस्तानमा रहेको समेत दाबी गरेका छन्। तर अफगानिस्तानको तालिबान सरकारले पाकिस्तानको यस्तो आरोपलाई निरन्तर अस्वीकार गर्दै आएको छ।