चौकुनेमा मानव बेचबिखन तथा ओसारपसारविरुद्धको १९औं राष्ट्रिय दिवस सम्पन्न

चौकुने गाउँपालिकामा मानव बेचबिखन तथा ओसारपसारविरुद्धको १९औं राष्ट्रिय दिवस मनाइएको छ ।
चौकुने गाउँपालिकाको आयोजनामा, समाज जागरण केन्द्र नेपालको आर्थिक सहयोग र सोसेक नेपालको सहजीकरणमा ‘तीनै तहका सरकारको प्रतिबद्धता : मानव बेचबिखनविरुद्ध सबैको ऐक्यबद्धता’ भन्ने मूल नाराका साथ दिवस मनाइएको हो ।

सन् २००२ मा काठमाडौंमा सम्पन्न सार्कको एघारौँ शिखर सम्मेलनबाट पारित महिला तथा बालबालिका बेचबिखनविरुद्धको महासन्धि २०६३ भदौ २० गते तत्कालीन प्रतिनिधिसभाबाट अनुमोदन गरिएको थियो । त्यही दिनको स्मरणमा हरेक वर्ष मानव बेचबिखनविरुद्धको दिवसका रुपमा मनाउन थालिएको हो ।दिवसका अवसरमा गुटुको विशालबजार देखि चौकुने गाउँ पालिकाको भवनसम्म सचेतनामूलक पम्पलेट बोकेर प्रभातफेरी निकालिएको हो। प्रभातफेरी बिशालबजारबाट पालिका भवनसम्म पुगेर कोणसभामा परिणत भएको थियो । प्रभातफेरी कार्यक्रममा सहभागीले ‘आफ्नो सुरक्षामा आफैं लागौँ, मानव बेचबिखनविरुद्ध हामी सबै जागौँ, हाम्रो सबैको एउटै चाहना मानव बेचबिखनरहीत समाजको परिकल्पना, हामी सबै लागौं, मानव बेचबिखन अन्त्य गरौं’ लगायतका प्लेकार्ड बोकेका थिए ।