सक्रिय मनसुनसँगै विभिन्न प्रदेशमा वर्षाको सम्भावना

मनसुन सक्रिय रहेसँगै देशका विभिन्न स्थानमा वर्षा हुने मौसम पूर्वानुमान जल तथा मौसम विज्ञान विभागले जनाएको छ।

विभागका अनुसार हाल मनसुनको न्यून चापीय रेखा पूर्वतर्फ सरदर स्थानभन्दा दक्षिणतर्फ र पश्चिमतर्फ सरदर स्थानको आसपासमा अवस्थित छ। यसका कारण अहिले देशभर सामान्यतया बदली देखिएको छ।

कोशी, बागमती र गण्डकी प्रदेशका केही स्थानमा तथा सुदूरपश्चिम प्रदेशका एक–दुई ठाउँमा हल्का वर्षा भइरहेको विभागले जनाएको छ।

आज दिउँसो पनि देशभर सामान्य बदली रहने अनुमान गरिएको छ। यस क्रममा कर्णाली र सुदूरपश्चिम प्रदेशका तराई तथा पहाडी भूभागका केही स्थानमा मध्यम वर्षा हुन सक्ने विभागको पूर्वानुमान छ। त्यस्तै, बागमती, गण्डकीलगायतका अन्य पहाडी भूभागका केही स्थान र तराईका एक–दुई स्थानमा समेत वर्षा हुने सम्भावना छ।

आज राति पनि देशभर सामान्य बदली रहनेछ। सबै प्रदेशका पहाडी भूभागका केही स्थानमा र तराईका थोरै स्थानमा मध्यम वर्षा पर्न सक्ने विभागले जनाएको छ।