विहान छिट्टै उठ्न सक्दैन ? यी सरल तरिका अपनाउनुहोस्

एजेन्सी । विहान सबेरै उठ्न नसक्नु आजकल धेरैको साझा समस्या बनेको छ । बिहान उठेर विभिन्न काम गर्ने योजना बनाए पनि समयमै ओछ्यानबाट उठ्न नसक्दा दिनको सुरुवात नै ढिलो हुने गर्छ । कामको थकाइ, मानसिक तनाव र अनियमित जीवनशैलीका कारण धेरैलाई बिहान उठ्न कठिन हुन्छ । अर्लाम बज्दा पनि उठ्ने सट्टा पुनः निद्रामा फर्किने बानीले यो समस्या झन् बढाइरहेको हुन्छ ।

तर, केही सरल बानी अपनाएर बिहान छिट्टै उठ्ने बानी बनाउन सकिन्छ । हेर्नुहोस्, यी उपयोगी उपायहरू —

१. बिहान उठ्ने योजना राति नै बनाउनुहोस्
सुत्नु अघि बिहान उठेर के गर्ने भन्ने योजना बनाउने बानी बसाल्नुहोस् । यसले तपाईंको मनलाई तयारी अवस्थामा राख्छ र बिहान उठ्न सहज बनाउँछ ।

२. अर्लाम बज्नेबित्तिकै उठ्ने बानी बसाल्नुहोस्
अर्लाम बज्दा ‘थप पाँच मिनेट’ भन्दै फेरि निदाउने बानी छोड्नुहोस् । तुरुन्तै उठेमा शरीर र मस्तिष्क सक्रिय हुन थाल्छ ।

३. राति चिया र कफीको सेवन नगर्नुहोस्
चिया वा कफीमा हुने क्याफिनले निद्रामा असर पुर्‍याउँछ । राति यस्तो पेयपदार्थ सेवन गर्दा बिहान उठ्न गाह्रो हुन्छ ।

४. सुत्नुअघि टिभी, मोबाइल वा ल्यापटप नहेर्नुहोस्
यी उपकरणका स्क्रिनबाट निस्कने ब्लु लाइटले निन्द्रा बिगार्छ । त्यसैले सुत्नु अघि कम्तीमा आधा घण्टा यस्ता उपकरण प्रयोग नगर्नुहोस् ।

५. नियमित सुत्ने र उठ्ने समय निर्धारण गर्नुहोस्
प्रत्येक दिन एकै समयमा सुत्ने र उठ्ने बानी बसाल्दा शरीरको बायोलोजिकल घडी स्थिर रहन्छ । यसले बिहान उठ्न सजिलो बनाउँछ ।

यी साना परिवर्तनहरूले तपाईंलाई बिहान छिट्टै उठ्ने बानी बसाल्न सहयोग पुर्‍याउनेछन् । निरन्तर अभ्यास र आत्मअनुशासनले तपाईंको बिहान ऊर्जावान् र स्फूर्तिदायी बन्न सक्छ ।