ओलीलाई नेतृत्व हस्तान्तरण गर्न योगेश भट्टराईको सुझाव

काठमाडौं — नेकपा (एमाले) का सचिव योगेश भट्टराईले पार्टी अध्यक्ष केपी शर्मा ओलीलाई सहजतापूर्वक नेतृत्व हस्तान्तरण गर्न सुझाव दिएका छन्।

पार्टीको दशौं केन्द्रीय कमिटी बैठकमा ‘आजको संकट र पार्टी पुनर्गठन’ विषयमा धारणा राख्दै भट्टराईले पार्टी पुनर्गठनको मूल आधार नेतृत्व हस्तान्तरण हुनुपर्ने बताएका हुन्।

उनले भनेका छन्, “पार्टी पुनर्गठनको महत्वपूर्ण आयाम नेतृत्वको हस्तान्तरण हो।”
भट्टराईका अनुसार विधान महाधिवेशनमार्फत अध्यक्ष ओलीलाई पुनः अध्यक्ष बनाउने सन्देश प्रवाह भए पनि वर्तमान असाधारण राजनीतिक परिस्थिति, जनताको अपेक्षा र समयको मागलाई मध्यनजर गर्दै अब त्यसबारे पुनर्विचार गर्नुपर्ने अवस्था आएको छ।

“यसका लागि वर्तमान अध्यक्ष कमरेडले सहजतापूर्वक नेतृत्व हस्तान्तरणको प्रस्ताव अघि सार्नु उपयुक्त हुन्छ,” भट्टराईले भनेका छन्।

भट्टराईले आफ्नो लिखित प्रस्तावमा दुईवटा विकल्प पनि प्रस्तुत गरेका छन्।
पहिलो विकल्प अनुसार, अध्यक्ष ओलीले तत्कालै वरिष्ठतम् नेतालाई कार्यवाहक अध्यक्षको जिम्मेवारी दिएर आगामी महाधिवेशनबाट सहमति वा प्रतिस्पर्धामार्फत नयाँ नेतृत्व चयन गर्नुपर्ने सुझाव दिएका छन्।

दोस्रो विकल्पमा, ओलीकै नेतृत्वमा पार्टीको महाधिवेशन सम्पन्न गरी महाधिवेशनमार्फत नेतृत्व हस्तान्तरणको पूर्वघोषणा गर्न सकिने उल्लेख गरिएको छ।
“यी दुई विकल्पमध्ये कुन बाटो रोज्ने भन्ने निर्णय अध्यक्ष कमरेडको अन्तरआत्मालाई छोड्नुपर्छ,” भट्टराईको धारणा छ।

भट्टराईको यो अभिव्यक्तिलाई पार्टीभित्र नेतृत्व हस्तान्तरणबारे नयाँ बहसको संकेतका रूपमा हेरिएको छ।