सुर्खेतमा तीजको मेला सकिएपछि सरसफाइ सम्बन्धी चेतावनी

सुर्खेत। हिजो सम्पन्न तीजको सद्भावना मेलाको सफल आयोजनाका लागि बगिना समूह, सुर्खेत र SASA School लाई धन्यवाद ज्ञापन गर्दै प्लेइङ फर चेञ्ज का अध्यक्ष प्रकाश खड्काले मेलापछि उत्पन्न फोहरलाई तत्काल व्यवस्थापन गर्न कडा आग्रह गरेका छन्।

मेलापर्वमा भीडभाड र फोहर हुनु सामान्य भए पनि यसको व्यवस्थापन अझ जिम्मेवारीपूर्ण कार्य भएको उनले बताए। आयोजकलाई आज वा भोलिसम्म मेलास्थल पूर्ण सफा गर्न अनुरोध गर्दै खड्काले भने,
“यदि भोलिसम्म पनि सरसफाइ भएन भने हाम्रो टोली पर्सि स्थलमै पुग्नेछ, त्यसपछि देखिने परिणामको जिम्मेवारी आयोजक वा सम्बन्धित निकायले लिनुपर्नेछ।”

यस्ता समस्या दीर्घकालीन रूपमा नदोहोरियोस् भनेर उनले वीरेन्द्रनगर नगरपालिकालाई पनि चेतावनी दिँदै भने, “अबदेखि मेला वा अन्य कार्यक्रमका लागि सार्वजनिक स्थल उपलब्ध गराउँदा सरसफाइ र व्यवस्थापनसम्बन्धी स्पष्ट सम्झौतासहित मात्र स्थान दिनुपर्छ।”