सुर्खेतमा घरबाटै लाखौंको सुन र नगद चोरी गर्ने १८ वर्षीय युवक पक्राउ

सुर्खेत । सुर्खेतको वीरेन्द्रनगरमा एक घरबाट लाखौं मूल्यका सुनका गरगहना र नगद चोरेको आरोपमा प्रहरीले एक जनालाई पक्राउ गरेको छ । जिल्ला प्रहरी कार्यालय सुर्खेतले वीरेन्द्रनगर नगरपालिका-४, नयाँ बजारस्थित एक घरबाट चोरी गरेको आरोपमा १८ वर्षीय युवकलाई पक्राउ गरेको हो ।

पक्राउ पर्नेमा वीरेन्द्रनगर नगरपालिका-६, शान्तिटोल बस्ने १८ वर्षीय अर्जुन गहतराज रहेका छन् ।

प्रहरीका अनुसार, यही साउन २१ गते दिउँसो करिब साढे ११ बजे वीरेन्द्रनगर-४ नयाँ बजारमा रहेको कल्पना मल्लको घरबाट चोरी भएको थियो । घरमा कोही नभएको मौका पारी चोरले २.५ तोलाको सुनको सिक्री, मंगलसुत्र, बेरुवा औंठी, काँक्रेविहार औंठी, झाला, क्लिप, ब्रास्लेट र नगद ५० हजार रुपैयाँ चोरेको भनी प्रहरीमा उजुरी परेको थियो ।

चोरीको सूचना पाएलगत्तै जिल्ला प्रहरी कार्यालयबाट खटिएको विशेष टोलीले अनुसन्धान सुरु गरेको थियो । प्रहरीले घटनास्थलको सूक्ष्म अनुसन्धान तथा सीसीटीभी फुटेजको विश्लेषणमार्फत चोरीमा संलग्न व्यक्तिको पहिचान गरेको थियो ।

अनुसन्धानका क्रममा चोरीमा संलग्न गहतराजलाई लुकीछिपी बसेको अवस्थामा पक्राउ गरिएको प्रहरीले जनाएको छ । उनको साथबाट चोरी भएका केही गरगहना समेत बरामद गरिएको छ । प्रहरीले उनको साथबाट सुनको ब्रासलेट १ थान, लेडिज औंठी १ थान, बेरुवा औंठी १ थान र सिक्री १ थान बरामद गरेको छ ।

पक्राउ परेका गहतराजलाई जिल्ला प्रहरी कार्यालय, सुर्खेतमा राखी चोरीसम्बन्धी कसुरमा मुद्दा दर्ता गरिएको छ र उनीमाथि थप अनुसन्धान भइरहेको प्रहरीले जानकारी दिएको छ ।